Мер Каҥаш лӱм дене чыландамат икымше шошо пайрем – Тӱнямбал ӱдырамаш кече дене шокшын саламлем!

Тиде пайрем илышышкына ныжыл кечыйолын шокшыж дене, пӱртӱс помыжалтме дене толеш. А тендан ныжыл шыргыжалмыда, нимучашдыме порылыкда тӱням волгалтарат да пояҥдарат.

Те воктен улыда гын, ме, пӧръеҥ-влак, кеч-могай нелылыкым сеҥен кертына!

Пагалыме ӱдырамаш-влак! Тыланда кӧра марий калык курым гыч курымыш шукемеш. Лач тендан поро мутда, шыма койыш-шокшыда, кожмак шӱм-чонда ешлан аралтыш семын улыт.

Посна каласыме шуэш еш йылме нерген. Тек кажне ешыште йӧратымаш дене пырля марий йылме ила – тиде калыкнан икымше поянлыкше, моло дечын ойыртемже. Тыште ӱдырамашын рольжо кӱкшӱ деч кӱкшырак!

Чылаланда пеҥгыде тазалыкым, кужу ӱмырым да тичшмаш еш пиалым тыланем. Тек родо тукымда, лишыл еҥда да икшывыда-влак таза, улан да полыш кидым шуялташ ямде шӱм-чонан лийыт. Пайрем дене!

Марий Оньыжа
Александров Эдуард Васильевич.