2017 ий 5 вӱдшор/апрельыште Оньыжа Александров Эдуард Васильевич Свердловск областьысе Красноуфимск ола округым вуйлатыше Ряписов Олег Викторович дене вашлийын мутланен.

Тыгодым Марий форумын шошо сессийжым эртарыме шотышто оргкомитет чумырген ыле. Оргйодыш-влакым рашемдыме. Красноуфимск районышто марий-влакым вашлияш ямде улыт да тидлан ятыр пашам шуктеныт.

А вес кечынже, 6 апрельыште, Оньыжа марий-влакын тӱшкан илыме Арти районышто лийын.
 Тыгак эн ончыч Арти ола округым вуйлатыше Константинов Алексей Андреевич ден тудын социальный йодыш дене алмаштышыже Токарев Сергей Анатольевич дене вашлийын.
Варажым корно Кӱркеде школышко, Марий Арти тӱвыра пӧртышкӧ да Ӱлыл Пардым школышко шуйнен. Тусо илышым Оньыжа районысо туныктыш пӧлкам вуйлатыше Спешилова Елена Александровна ден Токарев Сергей Анатольевич дене пырля ончен коштын. Ӱлыл Пардым школышто шукерте огыл йочасадыште лу ньогалан группым келыштареныт. Тушто йоча-влаклан марий тувырым урген пуэныт да марла мураш-кушташ шӱмаҥдат. А Марий Арти тӱвыра пӧрт пелен (вуйлатышыже Андриянов Роман Иванович) «Муро памаш» калык муро да «Улыбка» йоча студий-влак пашам ыштат. Тышке коштшо участник-влак яндар йӱкышт дене ойыртемалтыт.